Tag: Jumamosi

Mlevi ataka Katiba Mpya kama Kenya

            Baada ya mwana wa mfalme U-freedom Kinyataa kunyang’anywa ulaji wa dezo unaosemekana kupatikana kiharamu kwa njia ya uchakachuaji ambao sasa umegeuka fasheni Afrika, ilibidi nisukuti. Tokana na kusukuti huku, leo sitaki longolongo wala mizungusho bali kusema kwa kinywa kipana tena kwa herufi kubwa kuwa kaya yetu inahitaji katiba mpya ili kufanya mambo kisasa na si kizamani kama ilivyo na ilivyozoeleka. Hebu msomaji tuseme pamoja kwa herufi kubwa “TUNATAKA KATIBA MPYA ILI TUFANYE MAMBO MAPYA”
            Naona yule anagwaya akidhani yatamkuta yanayowakuta akina Tunduni Liisu. Ogopa Mungu si miunguwatu. Wanaweza kufunga mwili wako lakini  si mdomo wako wala mawazo yako. Kwani kaya hii ni yao au mama zao? Hebu tusema pamoja “TUNATAKA KATIBA MPYA SASA VINGINEVYO HAPAKALIKI HAPA.”
            Japo inaweza kuonekana kuwa najipa ujiko na kujifagilia, ni kwamba mawazo yangu yamechangia kufikia hapa ninapoongelea. Naona yule anatikisa kichwa na kusonya. Kama unadhani hizi ni kamba au longolongo asome gazeti la Kenya linaloheshimika la Daily Nondo utakuta nondo na vimondo vyangu. Kwa wasiojua hawa jamaa wanavyopendana kiasi cha kutotaka wageni waingilie mambo yao, kupata fursa ya kutupa mawe mle si kawaida. Lazima kichwa kiwe kinajibu na kuchemka kweli kweli. Nadhani mimi ni mlevi pekee toka Bongo aliyepata fursa ya kutupa mawe mle si mara moja wala mbili. Naona yule anazidi kubeua midomo na kutikisa kichwa. Maskini hajui kuwa nabii hakubaliki nyumbani yaani kwa kilatini Nemo profita in patria sua. Hayo tuyaache.
            Kuna maswali ya kujiuliza. Je ilikuwaje mwana wa mfalme akanyang’anywa tonge mdomoni wakati alikuwa na kila zana za kuchakachua? Si baada ya kustukia mchezo wa uchakachuaji, mpinzani wake Jadwong Madwong amaye by extension ni rafiki yangu na dingi, akaenda kwa Pilato. Kwa vile Katiba ya kule inaruhusu kila mlevi kwenda kwa Pilato anapohisi hajatendewa haki si Pilato akampa alichotaka kwa kumpiga chini mwana wa mfalme. Just imagine. Unadhani ingekuwa Bongolala na katiba yetu viraka jamaa angetoboa kama wasemavyo huko? Wala kisingeumana.
            Kwa vile nimependa chesi hii, nawaalika walevi wote wapenda demokrasia bila ghasia na maendeleo vya kweli waje tupange namna ya kuwabana wanene wetu warejeshe Katiba yetu mpya ya jaji Jose Waryuba iliyouawa na majambazi na mafisadi ili wasinyee debe kama akina Singasinga na Rugetumbuliwa bila kumsahau jamaa yangu Manjilinji. Au vipi walevi? Semeni kwa pamoja ‘Tumechoka na longolongo, ubabaishaji na mauaji ya Katiba mpya ya kaya.” Sema tena “Tunataka Katiba mpya na si uongo mpya.”
            Ninapoandika hapa, dingi atakuwa akitabasamu kwa swahiba yake kupata fursa nyingine ya kujaribu urahisi huku ndugu yangu Eddie aliyeshabikia upande wa pili akiugulia kwa machungu ya hukumu hii takatifu.
            Tukirejea umuhimu na majaliwa ya Katiba mpya, lazima niseme bila kumung’unya kuwa huwezi kuendeleza kaya bila kuwa na haki na uhuru kwa wanakaya kama ilivyo sasa. Hivyo basi, wote wanoota ndoto za nchana kuwa kaya inaweza kuendelea kwa maigizo wanapoteza muda. Maana, Katiba mpya ndiyo muarobaini wa ufisadi, uvivu na ubabaishaji ambavyo dingi amejaribu kutumbua akaishia kuchoka kabla hata hajamaliza ngwe moja. Hata hivyo, amejitahidi. Sema angekuw anashaurika, hakuna jambo la maana angewatendea walevi kama kufufua nchakato wa Katiba mpya ili itumike kuleta usawa, haki na uwajibikaji kayani kama ilivyotokea kwa majirani zetu wa the country of man eat man hivi karibuni.
            Huwezi kuendeleza kaya wakati kuna matabaka ya walevi ambapo wapo wasioguswa na wanaotolewa kafara kwa sababu wanaeleza mawazo yao ambayo ni haki yao kikatiba. Huwezi kuendeleza kaya kwa katiba viraka na makengeza kiutendaji ambapo baadhi ya wahalifu wanakingiwa kifua tokana na ukaribu wao kwa wakubwa au ukubwa wa vyeo walivyoshika au kushikwa na maswahiba au waramba viatu wao kama ilivyo.
            Leo sichongi sana. Nakwenda kujiandaa kulianzisha la kudai upya katiba mpya. Kusema ukweli natamani Maraga angekuwa Bongo lau tumpe ofa na kumpongeza. Kwa wale wanaoatamia katiba yetu mpya wakae wakijua kuwa wanakalia kaa la moto. Kumbe naota! Hata hivyo, tuseme “TUNATAKA KATIBA MPYA.”
Chanzo: Nipashe J’mosi, jana.

Mlevi kuanzisha chuo cha uchungaji na ushehe

          Kama mtume Po alivyoona mwanga akaanguka na kuokoka au mtume Mood alivyobanwa mbavu kule mwambani, nami nimetokewa na Yeye Aliye Juu; ameniamru nianzishe chuo ili kurejesha maadili na kuondoa madili. Hivyo, nitaitwa nabii wa maadili mpinga madili na upigaji.
            Kwa vile wengi wamejivisha utukufu na vyeo vya uchungaji na ushehe kiasi cha kuumiza na kupoteza wengi, imebidi nitangaze uokovu. Naona yule anatikisa kichwa na kusonya.  Anaona ajabu mimi kujadili masuala ya dini. Kwani dini hazijadili masuala ya ulevi na kuupiga marufuku ukiachia mbali kukandamiza mila za Kiswahili na kusaidia ukoloni kuenea Afrika? Kuna jipya gani hapa iwapo siku hizi tunasikia kila kashfa kuanzia zile za ubakaji, unajisi, ngono na kujitajirisha kwa kutumia neno la Bwana God? Unadhani mimi ni sawa na yule shehena anayejiita shehe aliyenusurika kunyotolewa roho na walevi baada ya kukutwa akiiba kiti moto siyo? Au unadhani mie ni sawa na hawa wachunaji wanaohubiri upuuzi huku wakiwaibia wajinga wengi na kuishia kuwa matajiri wa kunuka hadi wanajenga mahekalu na kununua mapipa? Unadhani mimi ni sawa na wale maaskopo makopo waliopokea njuluku za Jimmy Rugetumbuliwa na Singasinga? Mie si sawa na matapeili wanaojifanya kuchambua Biblia kutetea dini fulani wakionyesha ubovu wake wakati waliogopa umande. Kama wewe ni msomi si utumie kitabu chako na cha wengine uwaachie wenyewe? Wakigusa chako unatishia kunyotoa watu roho. Mie ni mtu wa God kweli kweli hata kama ninalewa. Tofauti yangu ni kwamba mimi nalewa kanywaji wala si dhambi kama uroho wa utajiri na uongo unaoitwa miujiza. Muujiza ninaotenda ni mmoja; kutongoa ambayo wengi wanayagwaya kutokana na kuelimika vya kutosha kama mimi.
            Hujawaona wanaodai wanatenda miujiza wakati miujiza yenyewe ni utapeli na wizi mtupu? Hujawaona wachunaji walioutumia kupata vyeo vya kisiasa kama vile uishiwa ukiachia mbali wanaojipachika usomi wakati ni vibashite na vihiyo?
            Kwa taarifa yako love it or hate it, mie nimetumwa na mwenyewe asiyeonekana kuwaokoa walevi toka kwenye ujinga na udhambi utokanao na kutaka kuonja pepo kabla ya kufa. Haiwezekani; lazima ufe ndiyo uione pepo.  Hata hivyo, ukisharejesha namba unadhani utarudi? Hata usipoikuta pepo wala moto, who knows?
            Naona yule anaanza kujinga kusema eti najadili dini. Why? Kama dini zenyewe zimekuwa zikitujadili na kutukana maadili yetu tangu ziliposaidia ukoloni na utumwa kuingia Afrika, nini mbaya kuzijadili hata kuzizodoa? Mie siyo kama huyu shehe aliyeiba kiti moto wala askofu aliyepokea njuluku za escrew. I know what I am doing; na isitoshe mie ni bonge la msomi wa theology na dogmata. Umenipata siyo? Hivi unategemea nifanye nini wakati walevi wanazidi kupigwa na matapeli kama Lungumi, Escrew, UdA na wengine wengi? Hukusikia hata wale tuliowaamini madaraka yetu walivyonyakua ardhi hadi sasa walipofichuliwa na dokta Kanywaji bin Mtumbuaji ambaye siku hizi ameanza kuchoka kutumbua?
            Mie si mchunaji wala shehena anayependa kula na wanene. Kazi yangu ni kurejesha maadili hasa baada ya kugundua kuwa ile katiba mpya ya maadili iliuawa ili kulinda madili ya wanene wa zamani ambao dingi ameamua kufa nao kwa kuwakingia kifua huku akiwaadhibu wadogo zao. Hivi unapochuka ardhi ya Fred ukaacha ya bwana Rukhusa na Uwazi na ufichi unafanya nini zaidi ya kuruka mkojo na kukanya manonihino. Je huku ndiko kutenda haki bila ubaguzi ambao siku zote humsikia Kaisari akijinadi kuwa hatajali chama, dini, kabila wala rangi ya mlevi. Fred anadai alikuwa akimilki hekari 300 na ushei wakati shehe Aliii anamilki 1000 na ushei. Hapa hujamgusa brother Dangerman Dugong Makapi aka Chingaz.
            Ni bahati mbaya kuwa wanafunzi wa nabii Musa aka Mchonga hawakumuelewa kiasi cha kujiingiza kwenye ujinga wasijue mambo huenda yanabadilika. Hawakujua kuwa atakuja dokta Tumbuaji na kuwatumbua kiasi cha kutia mchanga kitumbua chao. Walume wangapi wanaongea pumba tupu kama wewe mchunaji tapeli?
            Enzi za kukua kwetu, hakuna waliokuwa wakiaminika kama viongozi wa kiroho kabla ya kuchipuka wasaka ngawira na wachumia tumbo wanaohubiri na kufanya upuuzi kama ambaye juzi nilimsikia akisema eti wanawake huongea sana kuliko walume na maongezi yao asilimia kubwa ni pumba. Sijui huyu mchunaji anayesifika kwa kupiga kanywaji anaweza kumwambia utumbo huu mama yake asimuachie laana? Kama mkeo ni bomu, usitukana wanawake wote.
            Tokana na kuongezeka kwa kashfa zinazochafua na kuvunja heshima ya dini, nimeamua kuanzisha chuo cha kunoa mashehe na wachungaji ili wapambane na wachunaji na mashehena waliotamalaki kayani wakitenda kila aina ya dhambi.
Chanzo: Nipashe J’mosi leo.

Bi Mkubwa wangu kweli Mwanaume kama Akashia!

Mlevi kutia timu Ukanadani kudai njuluku

        Baada ya wanene kutupiga changa la macho kuwa wale waliowaita majizi sasa ni “wanaume” kama alivyokaririwa dingi akisema, nimeamua kutia timu Ukanadani kudai changu. Yule anatikisa kichwa; akidhani natania. Sitanii. Lazima nifanye kweli hasa baada ya kuona kama tunapikiwea zengwe.
        Wanaodhani ulevi na ulimbukeni vinanisumbua kama wale waliogeuza kaya ya walevi shamba la bibi halafu sasa wanatwambia kuwa tuwasulubu makuwadi wao wenyewe wakikingiana vifua utadhani kaya yetu ni mali ya kaisari pekee yake wanakosea. Nitafanya kweli.
        Zifuatazo ndizo sababu za nguvu zinazonisukuma kulianzisha ili nipate changu mapema usawa huu wa Chukua Chako Mapema:
       Mosi, nimeamua kudai changu baada ya kupata ushahidi kwa dingi mwenyewe kuwa kumbe wale tuliaminishwa na bingwa wa uvivu wa kufikiri Brother Denjaman Tunituni ni wawekezaji kumbe wachukuaji na wezi wa kawaida wanaopaswa kuchomwa moto na si kujadiliana nao. Hivyo, lazima niwabane wanipe changu mapema kabla sijamnyotoa mwizi roho. Wakikomaa nawapeleka kwa pilato tena kule ICC ambapo nitafungua mashitaka ya mauaji ya halaiki ya walevi kwenye migodi kule Bulyankulu na North Mara ukiachia mbali wanaofishwa na umaskini wa kutengenezwa. Nina ushahidi kibao; wachukuaji hawa wezi walinyotoa roho za walevi.
        Pili, nimestuka kusikia kuwa jamaa sasa wamegeuka washirika na washikaji tena wakipongezana kuwa ni wanaume kiasi cha kuanza mikakati ya kujadiliana ili kulipana. Tangu lini mwenye mali akajadiliana na mijizi? Mbona vibaka hamjadili nao zaidi ya kuwachoma moto; au ni kwa vile kuna wanene nyuma ya jinai hii? Hivi nani alituroga waswahili kiasi cha kuwashobokea watasha; na kusahau; hawa jamaa wana mizungu; na wamekuwa wakitukwamisha kiuchumi halafu wakitutukana kuwa sisi ni hamnazo na maskini wa kujitakia. Acheni uvivu wa kufikiri. Badilini sheria kabla ya kuingia kwenye mazungumzo. Mnakwenda kule na sheria zipi wakati zilizopo zinaruhusu upigaji?  Kama hamjui basi jueni. Kinachotaka kufanywa ni ukoloni wa kujitakia. Mtajuta halafu muanze kuja na rongorongo nyingine.
        Tatu, nimeamua kuchukua hatua hii adhimu baada ya kugundua kuwa lile zoezi la kubadili sheria za kijambazi za kaya ili kuziba mianya yote ya uchukuaji na umakinikia sasa limeota mbawa baada ya kuja na sinema hii ya majadiliano. Lazima niseme wazi. Nitakuwa na uhakika gani kuwa wale watakaoshiriki haya majadiliano hawatakuwa na roho mtakakitu kama wale mbweha waliouza kaya yetu kwa wachukuaji kiasi cha kugeuka ombaomba wakati tuna raslimali kibao? Naweza kusema huu ni ubaguzi wa rangi. Hivi hii jinai ingekuwa ingetendwa na mswahili mweusi kungekuwa na cha kuongea au kufunga maisha? Hivi kweli nani alituroga kiasi cha kuwa kama ndondocha huku tukifanya mchezo na mambo muhimu ukiachia mambo ya hovyo kuyageuza ya maana kana kwamba hatuna maana? Hivi huu ujambazi ungekuwa umetendwa na kaya ya Kiswahili dhidi ya kaya ya kitasha unadhani kungekuwa na majadiliano? Kawaulize Wairaki na walibywa watakwambia jamaa hawa wasivyo na mchezo na kaya uchwara ombaomba kama zetu.
         Tano, baada ya kugundua kuwa mambo yenyewe sasa yatafanywa kwa kutegemea usongo wa dingi na si sheria kiasi cha kugeuka kama mali binafsi, nami sina budi kuanza madai binafsi. Hapa lazima nikomae na kuwa makini na si makinikia. Lazima nidai hata njuluku za madini na si makinikia yaliyogawiwa na majambazi wakubwa wasio na umakini bali umakinikia kiakili. Naona yule anasonya. Atakayechukia uje yumo. Kwani hawa waliogawa madini yetu walitumia nini zaidi ya makinikia ya akili badala ya akili yenyewe? Kama si hivyo, inakuwaje tushupalie makinikia huku tukifumbia macho madini yenyewe? Kama siyo hivyo, inakuwaje tutegemee usongo wa mtu mmoja badala ya sheria na mkakati wa kaya kwa ujumla?
        Sita, napanga nikipewa changu najea kaya kuanza kudai mchakato wa katiba mpya. Kwa vile nitakuwa na njuluku kibao, nitazitumia kuwahamasisha walevi kuhakikisha katiba mpya inapatikana ili iweze kutusaidia kupambana na mibaka yote iliyohusika na uchafu huu bila huruma wala upendeleo kama ilivyo. Hapa lazima nihakikishe natumia njuluku yangu kuanzisha kile kinachoitwa haki sawa kwa walevi wote bila kujali sura, vyeo, ubashite na upuuzi mwingine ninaoona kila siku kilevi kayani. Bila shaka hapa walevi watanipongeza kwa kila hatua badala ya kupongeza wale wale walioasisi ujambazi huu.
        Kumbe nafasi imeisha! Acha nijikate kwenda kutafuta pasipoti tayari kwa kuwatokea wamakinikia kwa umakini.
Chanzo: Nipashe Jumamosi leo.

Kashfa ya IpTL: Barua ya wazi kwa EWuuRA

        Baaada ya kuchacha kiasi cha kukosa njuluku ya kupatia ulabu, niliamua kujisomea magazeti lau nijue umbea wa mjini; na nikakutana na kiroja cha mwaka! Guess what. Eti vilaza wetu wa mamlaka ya ulaji angani, nchi kavu na majini walioruhusu ujambazi wa IpTL wanatutaka tutoe maoni juu ya kuendelea kuhalalisha ujambazi huu. Mnakumbuka shuka asubuhi siyo? Mbona mlipoingia huu ujambazi hamkutaka maoni yetu; au mnataka mpate kisingizio cha kusema kuwa tulishirikishwa kubariki ujambazi huu? Mshindwe na kulegea. Kwanini kutangaza kwenye magazeti binafsi na si govt gazette?
            Kwa vile mmejivua nguo wenyewe, acha niwape ya moyoni kama ifuatavyo:
Kwanza, IpTL si kampuni sawa na makampuni mengine. Hivyo, haipaswi kufikiriwa wala kufaidi haki sawa na makampuni mengine yasiyotupiga kama wao. Hivyo, kama mnatafuta sababu ya kutushirikisha kwenye uchafu wenu, mkome.
          Pili, kabla ya kutaka maoni yetu, mnapaswa kutueleza ni kwanini mliingia ujambazi huu; na nani walihalalisha hii jinai; walipata nini na kiasi gani kwa sheria ipi? Kwanini sasa; na si huko nyuma mliponyea na kuivuja sheria kiasi cha kuigeuza kaya kichwa cha mwendawazimu aka shamba la chizi?
        Tatu, muweke wazi mikataba yenu na majambazi haya ili tujue kuna nini; na tunaongelea na kuchangia nini badala ya kutuuzia nguruwe kwenye gunia. Kumbaff.
         Nne, mtupe uhakikisho kuwa hamna nia mbaya nasi na kaya yetu kama ambavyo mmekuwa mikifanya ili kujipatia njuluku za haraka wakati mkiendelea kutupandishia bei ya umeme. Mnadhani hatujui kinachoendelea?
        Tano, muwachukulie hatua wote walioshiriki kuingiza kaya kwenye balaa hili la kiuchumi. Kama hamuwajui, ngoja niwatajie makuwadi wao. Yupo Jimmy Rugemalayer ambaye anasifika kuwahonga walafi kuanzia mawaziri, wabunge, viongozi wa kiroho wenye uroho hata majaji. Pili, yupo gabacholi Singasinga anayeishi Kenya ambaye aliibuliwa na majambazi wetu wa ndani ili kuficha uchafu wao.
       Sita, mtwambia chanzo cha upendo na uwazi huu ambavyo havikuwapo hapo mwanzo mlipofunga ndoa hii haramu ya kuangamiza kaya na walevi wake.
       Saba, mtuhakikishie kuwa walioingia mikataba hii hatari hamtawaita makaburi na kushindwa kuwafukua kwa kuhofia kushindwa kuwafukia kama alivyowahi kusema dingi ambaye ameonyesha wazi kuwagwaya hawa jamaa kana kwamba ana faida nao. Haiwezekani mkaendelea kutugeuza hamnazo huku mkitusanifu kuwa mnataka maoni yetu wakati mlipoingia kitandani kufanya ufuska huu wa kiuchumi tulipiga kelele mkatupuuza. Tutaamini vipi kama hamtatupuuza wakati huu. Kimsingi, kama mnataka mawazo nenda kwa akina Bashite wanaosikika na kusifika. Huenda watapata fursa hii kuanzisha sinema nyingine ili kuendelea kuwa madarakani wakati wana vyeti feki na wanatumia majina feki.
          Tukiachia mbali hawa vidagaa tuliowatajia hapo juu, je mko tayari kuweka wazi majina ya marais na mawaziri walioshiriki kusuka dili hili hadi likazaa jingine liitwalo EPA ambalo lilisababisha hasara ya mabilioni kwa kaya? Je mko tayari kuwaumbua waliotumia njuluku za EPA kuukwaa ulaji huku wakituache tuendelee kuliwa mbele na nyuma? Je hapa mnataka kumsanifu nani; na kwanini mnaendelea kututia madole machoni?
Guess what. Nimeamua kugusia kashfa hizi ili kuwaumbua Eula kuonyesha mnavyotaka kuendelea kuula wakati sisi tukiliwa. Mbona hamuongelei njuluku ya rada ambayo wakoloni kwa kiingereza walitaka kuwarejeshea mkakataa? Mbona  hamkumbushii kukataa kwenda Uswizini kupewa njuluku nyingi tu ambazo majambazi wetu wakubwa, mibaka na mipapa imeficha kule? Mbona hamuongelei kubadili sheria kuhusiana na kashfa kama ya IpTL?
        Kwa uzembe wenu mmekatiwa kitu kidogo na kikubwa mkalegea na kuachia kila kitu; halafu mnaanza kujishaua kuwa mnatafuta maoni. Nenda mkamuulize Kafulia aliyeibua na kuvalia njuga sakata hili hadi mkamtosa mjengoni. Kwani hatujui? Katika kufanya utafiti wangu juu ya kashfa hii niligundua kuwa kumbe IpTL inaweza kuwa Independent Protectorated Tanzia Ltd ambayo inalindwa na sirikali kama siyo sirikali ndani ya sirikali tena inayofanywa kuwa siri kali.
        Nimalizie kwa kutoa maoni yangu na ya walevi ninaowangoza kama ifuatavyo:
        Mosi, wanyonge wote walioguswa na kashfa hii bila kujali vyeo wala sura zao au ubashite wao.
        Pili, taifisheni mitambo ya IpTL kutokana na ukweli kuwa ni mali ya walevi ambayo imekuwa ikitumiwa kuwalangua umeme na kuwaibia.
        Tatu, taifa mimali ya wale wote waliohusika kwenye ufuska huu wa kiuchumi ndipo mje tuongee; na tuwafundishe jinsi ya kusimamia mali za umma. Itoshe kusema; walevi wamechoka kutiwa vidole na kugeuzwa samaki ambaye hukaangwa kwa kugeuzwa geuzwa kwa vile yu mfu.
         Leo hii tosha. Ngoja nikapige kanywaji tayari kuwatolea uvivu zaidi pale itakapobidi. Kwanini msiunde tume huru kama ya makanikia yatokanayo na ukosefu wa umakini?
Chanzo: Nipashe Jumamosi kesho.
Fear Nothing But Fear Itself